Vööl Wind, stadig Regen un Grummelweer, har de Weerbericht to vermelden. Glückelkerwies is datt anners kamen un de Sünn har Overhand övert de Wulken. De Swemmstreek harn wi weer mit Gymnatikballen markeert, wat in disse Jahr van de Paddelgrupp van´t WSV Nörden övernohmen wurr. De WSV´ler weern ok as Begleiten van de Swemmers de heele Tied darbi. An disse Stee, van´t Harten Dank vör jo Hülp.
De Deelnehmers kwammen van wiet her, enigen all jahrin, jahrut. Disse Mal harn wi sogaar Gasten ut Nederland un een Lage (dat liggt enerwegens achter Hesel) daarbi.
De tokiekers leepen kold Schuren an`t Rügg andal, as de achteihn Deelnehmer bi darteihn Graad Watertemperatuur in´t Nörder Deep gungen. Eerst mussen wi een Runn dört Polder swemmen, um daarna in Richtung Kurbelpünt oftodreihen bit se an de Ballen in verscheden Klöör ankwemen, de de Streeken von 2000, 3000 un 5000 m markeerden. Van dor ut gung dat weer um in Richtung Start un noch een Keer dört Polder.
De Wind heet uns neet good in´t Karten spöölt, bi de twee Runnen dör´t Polder, mussen wi düchtig tägen de Bulgenslag angahn. Butendeem sünd bi de stieve Noordostwind de Ballen de wi in´t Polder utsett harn, so wiet ofdreven, dat de Runn good 650m an Stee van 500 m lang weern.
Nadeem all Swemmers seker an Land werrn, hett uns Ofdelenbaas Gralf, de Tieden utweert und de Deelnehmers wurren mit een Urkunn ehrt. De Froolüü hebben as alltied, een Roos daarto kregen und för de Mannlüü geev dat Glückskokjes, waar Zedelekes mit plattdüütse Sprööken verstoken wassen.
All Gasten weern sük enig, dat se anner Jahr weer komen willen. Dat licht sachs daaran, dat wi weer so smakelk Koken uptafelt harn. Daarför gellt uns Dank Brigitte, Anke, Sonja, Bina un Madlen, de elke Jahr för lecker Smuus, Koffje und Tee sörgen. Uns Dank gellt aver ok all anner Helpers, ohn de wi so een Veranstalten nooit utrichten kunnen.